MISSIE
Om ’n kreatiewe platform te bied vir opkomende en gevestigde liedjieskrywers om met trots, passie en talent ’n nuwe Afrikaanse lied te skryf wat die stem van ons volk verteenwoordig en die toekoms van ons taal versterk.
Die SKRYF’it-kompetisie wil:
- Jong en ouer Afrikaanse liedjieskrywers aanmoedig om hul unieke stories, emosies en perspektiewe deur musiek te deel.
- ’n Lied identifiseer en belig wat nie net kuns is nie, maar ’n kulturele simbool – ’n lied met trefkrag, siel en nalatenskap.
- Die Afrikaanse taal verryk en versterk deur kreatiewe uitdrukkings wat Afrikaans relevant, vars en lewendig hou vir die volgende generasie.
- Die erfenis van Afrikaanse musiek eer deur ruimte te gee vir vernuwende bydraes wat voortspruit uit ’n diep liefde vir ons taal.
Ons glo dat taal ’n hartsaak is – en dat musiek die klop van daardie hart verwoord. SKRYF’it is ons manier om te wys: Afrikaans lééf, groei, en bly sing – met oorgawe, met moed en met liefde.
Visie
Ons droom is om ’n nuwe Afrikaanse treffer te ontdek wat harte aanraak, geslagte verbind en vir die volgende 100 jaar weerklank gee in die harte van Afrikaanssprekendes.
Die SKRYF’it-liedjieskryfkompetisie staan as ’n monument van kreatiwiteit, kultuur en taal. Ons sien ’n toekoms waarin nuwe stemme in die Afrikaanse musiekwêreld opstaan – jong, vars liriekskrywers en melodiebouers wat Afrikaans met vuur en waarheid laat sing. Hierdie platform is nie net ’n kompetisie nie, maar ’n beweging: ’n viering van die rykdom, emosie en krag van ons moedertaal.
In die eeufeesjaar van Afrikaans as amptelike landstaal, glo ons dat die volgende groot Afrikaanse treffer êrens wag om ontdek te word – ’n lied wat sal leef in die harte van mense, gesing word op feeste, by troues, in kerke en in huise. ’n Lied wat herinner, hoop en genees.
Ghoeroes
Herman Kleinhans
Ampie
Danie du Toit
William Wolf
Nádine
VOLG ONS OP
Kernwaardes
Kreatiwiteit en oorspronklikheid
Moedig vars, unieke storievertelling aan deur musiek.
Inklusiwiteit en diversiteit
Verwelkom alle Afrikaanse kunstenaars van alle agtergronde en genres.
Groei en geleenthede
Bied mentorskap, pryse en bedryfsverbindings aan.
Passie vir Musiek
Die bevordering van ‘n gemeenskap wat artistieke uitdrukking waardeer.
Kompetisieformaat
Hierdie is ’n liedjieskryfkompetisie wat oop is vir almal. Omdat baie liedjieskrywers nie noodwendig self uitvoerende kunstenaars is nie, is vyf musikale mentors – bekend as die ghoeroes – aangewys om saam met die topliedjieskrywers te werk. Hulle sal help om die liedjies verder te ontwikkel en sal uiteindelik self die deelnemer se liedjies tydens die finaal sing.
Die skrywer van die wenlied ontvang R25 000 kontant vir sy/haar oorspronklike werk.
Die wenlied sal deur die betrokke ghoeroe opgeneem en uitgereik word. Deelnemers wat tweede en derde eindig, kan ook pryse ontvang en hulle liedjies mag moontlik ook deur die ghoeroes opgeneem en vrygestel word.
Die outeursreg rakende die musiek en lirieke bly onderskeidelik by die komponis en liedjieskrywer, terwyl die skeppingsreg van die opname by die platemaatskappy berus wat die lied opneem.
In 2029 sal die wenlied in die FAK-Sangbundel opgeneem word – ’n publikasie wat in die publieke domein beskikbaar is. Alhoewel die liedjie dan as ’n FAK-lied erken word, bly die outeursreg steeds by die oorspronklike skrywer.
Verloop van die kompetisie
- Beoordeling en Top 20: Na die aanvanklike blinde beoordelingsproses (waarby die skrywers se privaat inligting nie bekend gemaak word aan beoordelaars nie, om bevooroordeling te voorkom) word 20 liedjies as die Top 20 aangewys.
- Toekenning aan ghoeroes: Die vyf ghoeroes—Nádine, Danie du Toit, Herman Kleinhans, Ampie en William Wolf – kry elk vier van die top-20-liedjies om mee te werk, wat lukraak getrek sal word.
- Keuring van Top 10: Elke ghoeroe kies hul gunsteling- twee liedjies uit die vier, wat ’n Top 10 tot gevolg het.
- Publieke stemproses: Die lirieke van die top-10-liedjies word op sosiale media en ander platforms gedeel, waarna die publiek stem om hul gunstelingliedjie vir elke ghoeroe te bepaal. Dit lewer die top-5-liedjies op.
- Mentorskap en verfyning: Elke ghoeroe werk dan saam met die top-5-liedjieskrywers van hul gekose lied om dit vir opname en optrede te verfyn. Nog ’n publieke stemproses sal begin om dan die beste 3 liedjies te kies.
- Finale en vrystelling: Die finaal vind tydens die FAK se GRA-week, op 9 Augustus, op die terrein van die Voortrekkermonument in Pretoria, plaas. Die deelnemers hoef nie by die finaal te wees nie aangesien die verteenwoordigende ghoeroe die lied sal sing, maar vir addisionele blootstelling vir die deelnemers sal bywoning aangeraai word. Indien die lied wen, word dit deur daardie ghoeroe opgeneem en kommersieel vrygestel. Die liedere wat tweede en derde eindig, mag moontlik ook opgeneem en kommersieel deur die verteenwoordigende ghoeroe vrygestel word.
Kompetisieformaat
- Veelvuldige musiekgenres. Almal is welkom – Pop, Rock, Country, Alternatief, R&B, ens.
- Inskrywingsproses – Aanlyn voorleggings met lirieke en stem-/instrumentele opnames.
- Beoordelaarspaneel – Bedryfspersoneel, kunstenaars en vervaardigers.
- Aanhangerbetrokkenheid – Openbare stemkomponent vir gehoordeelname.
- Grand Finale – Regstreekse optrede of virtuele vertoonvenster.
Pryse & Voordele
- Kontantbelonings en ateljeetyd – Om kunstenaars in hul musiekloopbane te ondersteun.
- Nasionale blootstelling op TV en deur sosialemediakanale
- Professionele terugvoer – Persoonlike kritiek van ervare liedjieskrywers.
- Bedryfsblootstelling – Geleenthede om kontak te maak met platemaatskappye, uitgewers en vervaardigers.
- Samewerkingsgeleenthede – Netwerk met medemusikante en professionele persone in die industrie.
Skryf In
Inskrywings is Gesluit
Inskrywings het gesluit! Hou dié spasie dop vir die volgende rondte.